भूमिका कोणतीही असो प्रेक्षकांच्या मनात घर करूनच जाणार अशी मराठीतील अभिनेत्री म्हणजे स्मिता तांबे. गेल्या काही दिवसांपासून स्मिता लहान आणि मोठ्या पडद्यापासून दूर आहे आणि त्याला कारणही तसंच आहे. स्मिता तांबेचे (Smita Tambe) काही महिन्यांपूर्वीच डोहाळे जेवणाचे व्हिडिओ आणि फोटो व्हायरल झाले होते. केवळ मराठीतच नाही तर अगदी वेबसिरीज आणि हिंदीमध्येही स्मिता तांबेने आपल्या अभिनयाने ठसा उमटवला आहे. 2019 च्या जानेवारीमध्ये स्मिताने विरेंद्र द्विदेवीसह लग्न केले. तर आता स्मिताला मुलगी झाल्याचे सांगण्यात येत आहे. तिने आपल्या अधिकृत सोशल मीडिया अकाऊंटवरून काहीही पोस्ट शेअर केली नसली तरीही तिच्या मित्रमैत्रिणींच्या स्टोरीवरून ही गोड बातमी समजली आहे.
अधिक वाचा – …म्हणून मयुरी देशमुख दिसते इतकी सुंदर, शेअर केलं सौंदर्याचं रहस्य
स्मिताचे डोहाळे जेवण व्हायरल
स्मिताच्या जवळच्या मैत्रिणी असणाऱ्या फुलवा खामकर, आदिती सारंगधर, रेशम टिपणीस यांनी स्मिताचा डोहाळे जेवणाचा खास कार्यक्रम केला होता. याचे व्हिडिओ खूपच व्हायरल झाले होते. चित्रपटातील डोहाळे जेवणाची गाणी म्हणत स्मिताभोवती गोल गोल फिरत सर्वांनीच मस्त ठेका धरला होता. तर यावेळी स्मिताचे पती विरेंद्र यांनीही उत्साहाने नृत्य केले होते. स्मिताला आवडेल अशा फुलांच्या माळांनी तिला सजवण्यात आले होते आणि गरोदरपणातील सुंदरता स्मिताच्या चेहऱ्यावर झळकत होती. स्मिता आणि विरेंद्र यांचे हे पहिलेच अपत्य असून बेटी धनाची पेटी असं म्हटल्याप्रमाणे नक्कीच त्यांच्यासाठीही ही अत्यंत सुखावह गोष्ट आहे. या दोघांवर सध्या शुभेच्छांचा वर्षाव सोशल मीडियाच्या माध्यमातून होत आहे. दरम्यान स्मिताने अजूनही आपल्या सोशल मीडिया अकाऊंटवर कोणताही फोटो अथवा यासंदर्भात कोणतीही पोस्ट शेअर केलेली नाही. त्यामुळे स्मिता ही गोड बातमी कधी शेअर करणार याचीच वाट पाहिली जात आहे. तिच्या चाहत्यांनी याची उत्सुकता लागून राहिली आहे. त्याहीपेक्षा स्मिताच्या मुलीचा गोंडस फोटो कधी पाहायला मिळेल याकडेही सर्वांचे लक्ष आहे.
अधिक वाचा – येऊ कशी तशी मी नांदायला मालिकेला नवं वळण, होणार प्रिया मराठेची एन्ट्री
मराठीसोबतच हिंदीतही दबदबा
मराठी मालिका, चित्रपटांसह स्मिताने हिंदीतही आपल्या अभिनयाचा दबदबा उमटवला आहे. पंगा, नूर, सिंघम रिटर्न, डबल गेम यासारख्या हिंदी चित्रपटातून स्मिताने काम केले असून सॅक्रेड गेम्सच्या दुसऱ्या सीझनमध्ये स्मिताची महत्त्वाची भूमिका होती. तसंच मराठीतील 72 मैल प्रवास या चित्रपटातील तिच्या भूमिकेने सर्वांचेच लक्ष वेधून घेतले. तिने यामध्ये वठवलेली राधाक्का आजही प्रेक्षकांच्या मनात घर करून आहे. स्मिताने तुकाराम, जोगवा, लाडाची लेक गं, परत, गणवेश यासारख्या अनेक मालिका आणि चित्रपटातून प्रेक्षकांना आपलेसे केले. तर हमीदाबाईची कोठी या नाटकातून तिला खरी ओळख मिळाली. तिच्या अभिनयाचे कौतुक या नाटकामुळे अधिक होऊ लागले. दरम्यान स्मिताने निर्मिती क्षेत्रातही पाऊल ठेवले आहे. सावट या चित्रपटाची निर्मिती स्मिताने केली असून यामध्येही तिने भूमिका केली होती. सध्या मात्र स्मिता खऱ्या आयुष्यात आईच्या भूमिकेसाठी तयार झाली आहे. त्यासाठी तिला सर्वांनीच भरभरून शुभेच्छा दिल्या आहेत. तर आता स्मिता आपल्या चिमुकलीचा फोटो कधी शेअर करणार याकडेच तिच्या चाहत्यांचे लक्ष लागून राहिले आहे.
अधिक वाचा – शनाया कपूरला पाहून म्हणाले ही तर दुसरी अनन्या पांडे
तुमच्या सौंदर्यामध्ये भर घालण्यासाठी POPxo आणि MyGlamm येत आहेत एकत्र. आमच्या The Great Glamm Survey मध्ये सहभागी व्हा आणि जिंका रुपये 1,000 हजार पर्यंतचा फायदा आणि सोबत मिळवा एक MyGlamm कडून मोफत लिपस्टिक
