झिम्मा’ची सिनेमागृहात पंच्याहत्तरी, दुसऱ्या भागाची चर्चा सुरू

लॉकडाऊन नंतर संपूर्ण महाराष्ट्रात आणि भारतात प्रदर्शित झालेला ‘झिम्मा’ हा पहिलाच मोठा मराठी चित्रपट आहे. या शर्यतीत बॉलिवुडचेही अनेक सिनेमे असताना देखील ‘झिम्मा’ (Jhimma) ने आपली घोडदौड कायम ठेवली. गेले अडीच महिने 91 टक्के प्रेक्षकांची पसंती मिळवत महाराष्ट्राचा नंबर एक चित्रपट असल्याचा मान ‘झिम्मा’ने पटकावला आहे. आजही अनेक सिनेमे प्रदर्शित होत असताना ‘झिम्मा’ने आपला रेकॉर्ड कायम ठेवला आहे. सोशल मिडीयावरही ‘झिम्मा’च्या लोकप्रियतेबद्दल अद्यापही चर्चा सुरु आहे आणि आता बघता बघता या चित्रपटाने सिनेमागृहात 75 दिवस साजरे केले आहेत.

अधिक वाचा – समंथा रूथ प्रभूने केले सान्या मल्होत्राच्या डान्सचे कौतुक

झिम्माची घोडदौड सुरूच    

हेमंत ढोमे दिग्दर्शित ‘चलचित्र कंपनी’ प्रस्तुत ‘अमेय विनोद खोपकर एंटरटेनमेंट’ आणि ‘क्रेझी फ्यू फिल्म्स’ निर्मित ‘झिम्मा’ 19 नोव्हेंबर 2021 ला प्रदर्शित झाला.  एका दिवशी एकाच चित्रपटगृहात सलग अठरा खेळ हाऊसफुल्ल करण्याचा अनोखा विक्रम या चित्रपटाने केला. प्रेक्षकांसह समीक्षकांची मने जिंकणारा हा आशयघन चित्रपट तिसऱ्या आठवड्यात आधीपेक्षा जास्त शोज मिळवून सुपरडुपर हिट ठरला. जगभरात 60 पेक्षा जास्त शहरांमध्ये प्रदर्शित झाला. झिम्माने आपल्या 50 व्या दिवशी महाराष्ट्रात 90 पेक्षा जास्त चित्रपटगृहांमध्ये राहून आपला गौरवशाली 50 दिवस साजरा करण्याचा रेकॉर्ड बनवला. कोविड काळात पन्नास टक्के आसन क्षमता असतानाही प्रेक्षकांना सिनेमागृहात आणून 14.50 करोडची कमाई करणारा हा ब्लॉकबस्टर चित्रपट आजही सिनेमागृहात प्रेक्षकांची मनं जिंकत आहे. हा सिनेमा काही दिवसांपूर्वी ओटीटीवर प्रदर्शित झाला असला तरीही चित्रपटगृहात जाऊन ‘झिम्मा’ पाहणारा प्रेक्षकवर्गही कायम आहे. ॲमेझॉन प्राईम इंडियावर भारतातील पहिल्या पाच चित्रपटांमध्ये झळकण्याचा बहुमान पटकावला आहे.

अधिक वाचा – एस एस राजमौलीचा ‘आरआरआर’ आता या तारखेला होणार प्रदर्शित

महिलांनी घेतले डोक्यावर 

महाराष्ट्रातल्या महिलांनी या चित्रपटाला अक्षरशः डोक्यावर घेतले. अनेकींनी ‘झिम्मा’ पासुन प्रेरित होऊन सहलींचे आयोजनही केले आणि सोशल मीडियाच्या माध्यमातून आपल्या सहलींचे फोटोज ‘झिम्मा’च्या टीमपर्यंत पोहोचवले. प्रेक्षकांकडून मिळणाऱ्या प्रतिसादामुळे आणि प्रेमामुळे आज झिम्माने अमृतोत्सवापर्यंत मजल मारली. इतकेच नाही तर मराठी चित्रपटांसाठी चित्रपटगृहांची दारेही पुन्हा उघडली. सलग 11 आठवडे प्रेक्षकांच्या मनावर अधिराज्य गाजवणारा हा चित्रपट आता केवळ चित्रपट राहिला नसून तो आता एक सोहळा झाला आहे.

‘झिम्मा’ चित्रपटात सिद्धार्थ चांदेकर (Siddharth Chandekar), निर्मिती सावंत (Nirmitee Sawant), सुहास जोशी (Suhas Joshi), सुचित्रा बांदेकर (Suchitra Bandekar), क्षिती जोग (Kshiti Jog), सोनाली कुलकर्णी (Sonalee Kulkarni), सायली संजीव (Sayali Sanjeev), मृण्मयी गोडबोले (Mrunmayee Godbole) यांच्या प्रमुख भूमिका आहेत. तर चित्रपटाच्या लेखनाची धुरा इरावती कर्णिक यांनी सांभाळली असून संगीत अमितराज यांनी केले आहे. क्षिती जोग यांच्यासोबत स्वाती खोपकर, अजिंक्य ढमाळ, विराज गवस, उर्फी काझमी, सनी शाह यांनी या चित्रपटाची निर्मिती केली आहे.

अधिक वाचा – आयुष्यात प्रेमाचे रंग उधळणार ‘मेरी गो राऊंड’

हेमंत ढोमेने व्यक्त केले प्रेम 

 ‘झिम्मा’ च्या यशाबद्दल दिग्दर्शक हेमंत ढोमे म्हणतात, ‘झिम्मा’ला प्रेक्षकांकडून मिळत असलेले प्रेम पाहून माझ्या मनात आज अनेक भावना आहेत. ‘झिम्मा’ प्रेक्षकांसाठी जशी रोलरकोस्टर राईड होती, तशी अनेक कारणांमुळे ती माझ्यासाठीही होती. मागील दोन वर्षांत अनेक वेळा प्रदर्शनाच्या तारखा बदलाव्या लागल्या होत्या, अनेक अडचणी आल्या तरीही बऱ्याच प्रतिक्षेनंतर सिनेमा चित्रपटगृहात प्रदर्शित झाला. पहिल्या दिवसापासून पंचाहत्तर दिवसांचा हा यशस्वी प्रवास तमाम प्रेक्षकांमुळेच शक्य झाला असे मी म्हणेन. रसिक प्रेक्षकांचे मनापासून आभार.  झिम्मा पार्ट 2 येणार का? या प्रश्नाला मात्र त्यांनी हसरा चेहरा ठेवत काहीही बोलण्याचं टाळलंय. त्यामुळे झिम्मा 2 प्रेक्षकांच्या भेटीला येणार का यासाठी थोडी वाट बघावी लागणार आहे.