बॅालिवूड, मराठी चित्रपटांच्या प्रदर्शनांची रांग लागलेली असतानाच आता लवकरच आणखी एक जबरदस्त मराठी चित्रपट लवकरच प्रेक्षकांच्या भेटीला येणार आहे. ‘विशू’ (Vishu) असे या चित्रपटाचे नाव असून गश्मीर महाजनी (Gashmir Mahajani) विशूच्या भूमिकेत दिसणार आहे. या चित्रपटाचे टिझर पोस्टर नुकतेच सोशल मीडियावर प्रदर्शित करण्यात आले. बाबू कृष्णा भोईर निर्मित या चित्रपटाचे दिग्दर्शन मयूर मधुकर शिंदे यांनी केले आहे. चित्रपटातील नायक ‘विशू’ निसर्गरम्य अशा कोकणातील समुद्रात, निरभ्र आकाशाखाली, बोटीवर मंद लाटांच्या हेलकाव्यात पहुडलेला दिसत आहे. त्याच्या मनात नक्की कोणते वादळ सुरु आहे, हे जाणून घेण्यासाठी मात्र 1 एप्रिलपर्यंत वाट पाहावी लागणार आहे. एक अनोखी प्रेमकथा असणाऱ्या या चित्रपटात गश्मीरसोबत मृण्मयी गोडबोल (Mrunmayee Godbole), ऐताशा संझगिरी, मानसी मोहिले, मिलिंद पाठक, विजय निकम, संजय गुरबक्शानी अशी तगडी स्टारकास्ट आहे.
अधिक वाचा – प्रेमाच्या महिन्यात होणार लोचा… लोच्या झाला रे 4 फ्रेबुवारीला प्रदर्शित
ही आहे गोड प्रेमकहाणी
चित्रपटाचे दिग्दर्शक मयूर मधुकर शिंदे म्हणतात, ‘’या चित्रपटाच्या प्रदर्शनासाठी मी खूपच उत्सुक आहे. गश्मीर, मृण्मयी बरोबरच विशूमधील सगळ्याच कलाकारांसोबत काम करताना खूप मजा आली. मुळात हे सगळेच कसलेले कलाकार आहेत. दोन परस्परविरोधी स्वभाव जेव्हा एकत्र येतात तेव्हा काय होते, हे एका गोड प्रेमकहाणीमधून दाखवण्याचा प्रयत्न ‘विशू’मधून करण्यात आला आहे. मला खात्री आहे, हा चित्रपट नक्कीच प्रेक्षकांच्या पसंतीस उतरेल.’’ श्री कृपा प्रॅाडक्शनचा ‘विशू’ हा प्रदर्शित होणारा दुसरा चित्रपट असून येत्या काळात श्री कृपा प्रॅाडक्शनचे बरेच चित्रपट प्रेक्षकांच्या भेटीला येणार आहेत. ‘विशू’ची कथा मयूर मधुकर शिंदे यांची असून पटकथा आणि संवाद हृषिकेश कोळी यांचे आहेत. या चित्रपटाला ऋषिकेश कामेरकर यांचे संगीत लाभले असून गाण्यांचे बोल मंगेश कांगणे यांचे आहेत. तर छायाचित्रणाची धुरा मोहित जाधव यांनी सांभाळली आहे.
अधिक वाचा – नागार्जुनच्या ‘दी घोस्ट’ मधून जॅकलिन फर्नांडिसचा पत्ता कट
गश्मीरची क्रेझ
मराठी चित्रपटांना पुन्हा एकदा सुगीचे दिवस आले आहेत असं म्हणावं लागेल. थिएटरमध्ये जाऊन प्रेक्षक पुन्हा एकदा चित्रपट पाहून दाद देऊ लागले आहेत. तर नवा येणारा चित्रपट विशू यामध्ये गश्मीर महाजनी प्रमुख भूमिकेमध्ये आहे. गश्मीर सध्या एका हिंदी मालिकेतही काम करत आहे. त्याचा खूप मोठा फॅन फॉलोईंग आहे. मराठी आणि हिंदी या दोन्ही क्षेत्रांमध्ये गश्मीरने भक्कम पाय रोवले आहेत. दिसायला अत्यंत सुंदर आणि तितकाच सहज अभिनय यामुळे गश्मीरची क्रेझ चाहत्यांमध्ये दिसून येते. याशिवाय गश्मीर आपल्या सोशल मीडिया अकाऊंटवरही तितकाचा अॅक्टिव्ह दिसून येतो. अत्यंत उत्तम डान्सर असल्यामुळे आपल्या डान्सचे अनेक व्हिडिओ गश्मीर पोस्ट करत असतो आणि या व्हिडिओचे अत्यंत उत्तम व्ह्यूजदेखील त्याला मिळतात. आता या चित्रपटामध्ये नक्की गश्मीरची भूमिका काय आहे आणि गश्मीरला बऱ्याच वर्षांनी पुन्हा एकदा चित्रपटात पाहण्यासाठी त्याचे चाहते नक्कीच उत्सुक आहेत. प्रेमकहाणी म्हणजे नक्की काय आहे? नायकाच्या मनातील वादळ काय आहे असे अनेक प्रश्नही आता प्रेक्षकांना पडायला लागले असून आता या ट्रेलरची वाट चाहते पाहत आहेत. पण संपूर्ण चित्रपटासाठी मात्र एप्रिलपर्यंत प्रेक्षकांना वाट पाहावी लागणार हे नक्की!
अधिक वाचा – देवमाणूस’ फेम आणि नृत्यांगना माधुरी पवार दिसणार ‘दिशाभूल’ मध्ये
तुमच्या सौंदर्यामध्ये भर घालण्यासाठी POPxo आणि MyGlamm येत आहेत एकत्र. आमच्या The Great Glamm Survey मध्ये सहभागी व्हा आणि जिंका रुपये 1,000 हजार पर्यंतचा फायदा आणि सोबत मिळवा एक MyGlamm कडून मोफत लिपस्टिक
