साधारणतः बॉलीवूडमध्ये येण्याआधी दाक्षिणात्य चित्रपटात झळकून मग इथे येतात किंवा मराठीतील प्रसिद्ध अभिनेते सयाजी शिंदे ज्यांनी दाक्षिणात्य सिनेसृष्टीत आपलं विशेष स्थान बनवलं आहे. पण दाक्षिणात्य सिनेसृष्टीतील कोणी अभिनेता किंवा अभिनेत्री मराठी चित्रपटात येणं अपवादानेच होतं. खरंतर एका सच्च्या कलाकाराला त्याच्या अंगी असलेले गुण आणि कौशल्य जगासमोर दाखवण्यासाठी एका माध्यमाची आणि पाठिंब्याची गरज असते. मराठी चित्रपटसृष्टीत अशा कलाकारांचं नेहमीच स्वागत आहे.
‘मंगली’ गायन क्षेत्रातील नवीन आकर्षण
नावातच मंगल असलेल्या ‘मंगली’ दाक्षिणात्य सिनेसृष्टीतील गायन क्षेत्रातील नवीन आकर्षण बनली आहे. मंगलीचे मूळ नाव सत्यवती मुडावत, जन्म आंध्रप्रदेश सध्या तेलंगणा राज्यातला. जन्मापासूनच स्वत:च्या अस्तित्वासाठी, हक्कासाठी आणि प्रेम मिळवण्यासाठीचा मंगलीचा संघर्ष ते टॉलीवूडमधील सप्तगिरी, शैलेजा रेडी अल्लुडू, राज महाल, निधी नाडीओके कथा व अला वैकुंठरमल्ले (२०१९) या सुपरस्टार अल्लू अर्जुनच्या चित्रपटातील रामुलो रामला या गाण्याला मिळालेले तब्बल २०० मिलिअन व्ह्युजच्या रुपातून मिळालेले यश असा हा मंगलीचा यशाच्या मार्गाकडे होणारा प्रवास आता लवकरच आणखी एका नव्या आणि वेगळ्या वळणावर येणार आहे.
गायनासोबतच अभिनयातही अव्वल
अनेकांच्या मनात हक्काचं स्थान निर्माण करणारी मंगली ही अप्रतिम गायिका तर आहेच पण त्याचबरोबर ती सुंदर अभिनेत्री देखील आहे आणि आता ती लवकरच मराठी सिनेमामध्ये पदार्पण करणार आहे. श्री. संजीवकुमार राठोड निर्मित आणि दिग्दर्शित ‘आमदार निवास’ या आगामी मराठी चित्रपटात मंगली आपल्या गोड आवाजाचा आणि अभिनयाचा ठसा उमटवणार आहे. ‘कती तू बंजारा’ या गाण्यामार्फत मंगली आपला मराठमोळा प्रवास सुरु करत आहे. मंगलीचा मधयुक्त स्वर, गोर बंजारा समाजातील सिंधू संस्कृतीची झलक व बॉलिवूडचे सुप्रसिध्द नृत्यदिग्दर्शक विष्णु देवा ‘कती तू बंजारा’ हे गाणं नक्कीच महाराष्ट्रातील तमाम जनतेच्या मनात जागा करेल यात शंका नाही.
मंगली या गाण्यात नृत्य पण करणार आहे. ‘कती तू बंजारा’ हे गाणं प्रसिध्द ‘गीतांजली’ या गोर बंजारा अल्बममधील आहे. 90 च्या दशकात या अल्बमने अक्षरश: धुमाकूळ घातला होता. संगीताला भाषेचं बंधन नसतं. या अल्बममधील गाणी गोरबोली भाषेत होती. या अल्बममधील गाणी एवढी अप्रतिम होती की सर्व समाजातील लोकांनी या अल्बमला भरपूर प्रेम दिलं. गीतांजली म्युझिक अल्बचे गीतकार, संगीत दिग्दर्शक व निर्माते श्री. डॉ. गीतकुमार पवार यांचं स्वप्नं होते की गीतांजली ऑडियो अल्बममधील गाणी रुपेरी पडद्यावर झळकावी. ते स्वप्न पूर्ण करण्याचं काम निर्माते आणि दिग्दर्शक श्री. संजीवकुमार राठोड यांनी आपल्या हाती घेतलं आणि ‘आमदार निवास’ या त्यांच्या आगामी मराठी सिनेमात त्या अल्बममधील ‘कती तू बंजारा’ हे गाणं चित्रित केलं.
मंगलीच्या आयुष्याची संघर्षमय कहाणी
मंगलीच्या आई-वडीलांना 12 वर्षे कोणतेही अपत्य नव्हते. दवाखाना, वैद्य, नवस, पूजा, मंदिर हे करत करत शेवटी 12 वर्षानंतर त्यांना मंगलीच्या रुपाने मुलगी झाली. या इतक्या वर्षाच्या तपाची सर्वात मोठी गोष्ट म्हणजे मंगलीच्या आईने 12 वर्षे आपल्या पायात चप्पल घातली नाही. पण एवढ्या तपानंतरही मुलांऐवजी मुलगी झाली याचा राग तिच्या आईला आला व तीन दिवस तिने मंगलीपासून तोंड फिरवले. एकीकडे गरिबी आणि दुसरीकडे मुलगी ही दोन्ही गोष्टींमुळे मंगलीला संघर्ष करावा लागला. पण सुदैवाने मंगलीला साथ मिळाली आपल्या मधुर आवाजाची आणि आपल्या वडिलांची आणि वारसा म्हणून गोर बंजारा समाजातील सुंदर, सुरेख प्राचीन लोकगीताची. तोच वारसा मंगलीने जपला व संगीत आणि कला क्षेत्रात आपली कारकिर्द घडविण्याचा निश्चय केला. कलेला गुणवत्ता व परिश्रमाबरोबर शिक्षणाची साथ मिळावी म्हणून मंगलीने कर्नाटक म्युझिकमध्ये एस.व्ही.युनिव्हर्सिटीमध्ये डिप्लोमा केला.
आता मंगलीची गायन आणि अभिनय कला श्री. संजीवकुमार राठोड निर्मित आणि दिग्दर्शित ‘आमदार निवास’ या आगामी मराठी चित्रपटाच्या माध्यमातून मराठी प्रेक्षकांना लवकरच अनुभवयाला मिळणार आहे.
बेस्ट ऑफ लक मंगली.
‘अर्जुन रेड्डी’सोबत काम करण्यास करण जोहर उत्सुक, दिली मोठी ऑफर
2020 ची सुरुवात करा POPxo च्या नव्या कोऱ्या प्लॅनर्स आणि स्टेटमेंट मेकिंग स्वेटशर्टने. जे आहेत तुमच्यासाठी एकदमच कूल! विशेष म्हणजे यावर तुम्हाला मिळणार आहे 20% ची अतिरिक्त सूट. मग वाट कसली पाहताय लगेचच शॉपिंग करण्यासाठी POPxo.com/shop ला भेट द्या.
