अनिता दातेच्या फोटोमुळे चर्चांना उधाण, राधिकाचा पुनर्जन्म की अजून काय

अनिता दाते – केळकर (Anita Date – Kelkar) हे नाव मराठी प्रेक्षकांना माहीत नाही असं होणारच नाही. माझ्या नवऱ्याची बायको (Mazya Navryachi Bayko) या मालिकेतून राधिका म्हणून घराघरात पोहचलेली अनिता पुन्हा एकदा चर्चेत आली आहे ती तिने पोस्ट केलेल्या फोटोमुळे. अनिता सध्या काय करतेय आणि तिचे पुढचे प्रोजेक्ट काय असणार याबाबत तिचे चाहतेही उत्सुक होते. तसंच पुन्हा अनिता लहान पडद्यावर कधी पुनरागमन करणार याचीही सतत विचारणा चालू होती. दरम्यान अनिताने एक आपल्याच फोटोफ्रेमला हार घातल्याचा फोटो शेअर केल्यामुळे पुन्हा एकदा चर्चेत आली आहे. 

जो आवडतो सर्वांना…

अनिता नेहमीच सोशल मीडियावर सक्रिय असते आणि आता तिने एक फोटो पोस्ट केला आहे. त्यामध्ये ती एका फोटो फ्रेममध्ये साडी आणि चष्मा लाऊन त्यावर हार घातला आहे असे दिसत आहे. त्यावर कॅप्शन म्हणून तिने ‘जो आवडतो सर्वांना’ असे लिहिले आहे. त्यामुळे तिच्या या फोटोवर भरभरून कमेंट्सचा वर्षाव होत आहे. अनिता नक्की आता मालिकेतून दिसणार की नाटक, चित्रपट नक्की कोणता मनोरंजनाचा डोस अनिता घेऊन येणार आहे याकडे सर्वांचे लक्ष लागले आहे. अनेकांनी कमेंट्समध्ये नक्की हे काय आहे अशा आशयाच्या कमेंट्स केल्या आहेत. ‘काय हे’ असं विचारत अभिनेत्री श्रुती मराठेने कमेंट केली आहे तर, दिग्दर्शक निपुण अधिकारीने हाहाहा अशी कमेंट करत तिचा हा फोटो हसण्यावारी नेलाय. अभिनेत्री किशोर अंबियेने ‘अगं येडी, काय हे’ असं विचारलं आहे, तर पर्ण पेठे, सागर कारंडेनेही अनिताच्या या फोटोवर कमेंट करत पुढच्या वाटचालीसाठी शुभेच्छा दिल्याने हे नक्कीच कोणत्या तरी नव्या प्रोजेक्टचेच प्रमोशन आहे इतके मात्र तिच्या चाहत्यांसाठी नक्की झाले आहे. 

राधिकाचा पुनर्जन्म तर नाही ना

पण नक्की हे काय आहे, राधिकाचा पुनर्जन्म तर नाही ना असे मजेशीर अंदाजही प्रेक्षक आता बांधू लागले आहेत. माझ्या नवऱ्याची बायको ही मालिका खूपच गाजली होती आणि त्यातील अनिताची राधिका ही भूमिका अनेक महिलांना आपलीशी वाटत होती. त्यामुळे आता हा फोटो पाहून पुन्हा राधिका तर येत नाही ना आणि या मालिकेचा पुढचा भाग तर येत नाही ना? असा अंदाज आता सोशल मीडियावर बांधण्यात येत आहे. तर एका नेटकऱ्याने लिहिले आहे की, ‘सगळ्या इच्छा पूर्ण झाल्या आहेत ना तुझ्या? नाहीतर पिंडाला कावळा शिवणार नाही’ तर काही प्रेक्षकांना भावूक होत खरंच आत्म्यास शांती मिळो स्वरूपाच्या कमेंट्स केल्या आहेत. त्यामुळे आता नक्की काय आहे यावरून अनिता नक्की कधी पडदा उलगडणार याकडेच सर्वांचेच लक्ष लागून राहिले आहे. मात्र अनिताच्या या नव्या प्रोजेक्टबाबत अधिक कोणतीही माहिती मिळालेली नाही. काही महिन्यांपूर्वी प्रदर्शित झालेल्या ‘मी वसंतराव’ (Mi Vasantrao) या चित्रपटामध्ये अनिताने वसंतराव देशपांडे यांच्या आईची भूमिका साकारली होती आणि तिचे या भूमिकेसाठी कौतुकही झाले होते. तर आता नक्की कोणत्या भूमिकेत ती दिसणार आहे आणि ‘हम पाँच’ (Hum Panch) या हिंदी मालिकेप्रमाणे एखादी मराठी मालिका तर येत नाही ना अशीही कुजबूज आता सुरू झालेली दिसून येत आहे.

तुमच्या सौंदर्यामध्ये भर घालण्यासाठी POPxo आणि MyGlamm येत आहेत एकत्र.  आमच्या  The Great Glamm Survey मध्ये सहभागी व्हा आणि जिंका  रुपये 1,000 हजार पर्यंतचा फायदा  आणि सोबत मिळवा एक  MyGlamm कडून मोफत लिपस्टिक