येऊ कशी तशी मी नांदायला ही मालिका अगदी कमी वेळातच प्रेक्षकांच्या पसंतीस उतरली होती. मालिका सुरू होण्याआधी दाखवण्यात आलेल्या प्रोमोमधून या मालिकेचा विषय नेहमी पेक्षा वेगळा असणार असं पक्कं झालं होतं. सासू सुनेचा वाद मालिकेत पाहण्यापेक्षा सासू सुनेची मैत्री यात पाहायला मिळणार यामुळे मालिका सुरू होण्याआधीच या मालिकेबद्दल उत्सुकता पाहायला मिळाली होती. मालिकेमधील कलाकारांनीही आपल्या उत्तम अभिनयाने या मालिकेत जीव ओतला. ओम स्वीटू यांची अनोखी जोडी एकत्र येण्यासाठी प्रेक्षक प्रार्थना करू लागले. मात्र अचानक आलेल्या ट्विस्टमुळे प्रेक्षकांची चांगलीच निराशा झाली. महाएपिसोडनंतर एक विलक्षण वळण मालिकेला आलं ते म्हणजे स्वीटूच लग्न ओम सोबत न होता मोहित सोबत झालं. हा ट्विस्ट प्रेक्षकांच्या पचनी पडला नाही आणि मालिकेच्या टीआरपीवर परिणाम जाणवू लागला. एवढंच नाही तर सोशल मीडियावर मालिका बंद करण्याची मागणी होऊ लागली. यामुळे मग आता निर्मात्यांनी मालिकेला पुन्हा एकदा एक वेगळं वळण देत मालिकेतील ही चूक सुधारण्याचा प्रयत्न केला आहे. आता या मालिकेत अभिनेत्री प्रिया मराठेची एन्ट्री होणार आहे.
‘माझी तुझी रेशीमगाठ’ची पहिल्याच आठवड्यात प्रेक्षकांवर चांगली पकड
काय आहे हे नवं वळण
मालिकेत आता स्वीटू आणि मोहित लग्नाचं नाटक सर्वांसमोर निभावताना दिसत आहेत. त्यात स्वीटूला अजूनही माहित नाही आहे कि ओम लग्नाच्या दिवशी कुठे होता. ओम देखील स्वीटूच्या प्रेमाखातर तिला हे सत्य कळू देत नाही आहे. स्वीटूला जरी मोहित सोबत झालेलं लग्न मान्य नसलं तरी ती घरच्यांसाठी ती खुश आहे असं त्यांना भासवून चेहऱ्यावर खोटं हसू आणतेय. मात्र हे नाटक प्रेक्षकांना मुळीच आवडलेलं नाही. ज्यामुळे मालिकेचा टीआरपी अचानक कमी झाला आहे. आता ओम आणि स्वीटू पुन्हा एकत्र यावे अशी प्रेक्षकांची इच्छा आहे. त्यामुळे या मालिकेत अजून एक रंजक वळण येणार आहे.
शाहिद कपूर मीराला पाठवतो ‘हे’ मेसेज, मीरा कपूरने शेअर केला स्क्रीनशॉट
यासाठी मालिकेत प्रिया मराठेची एन्ट्री
ओम आणि स्वीटूला एकत्र आणण्यासाठी या मालिकेत एका नवीन चेहऱ्याची एंट्री होणार आहे. अभिनेत्री प्रिया मराठे आता या मालिकेतून प्रेक्षकांच्या भेटीस येणार आहे. ती मालिकेत एका सकारात्मक भूमिकेत दिसणार असून तिच्यामुळे ओम आणि स्वीटू पुन्हा एकदा एकत्र येणार आहेत. या भूमिकेबद्दल बोलताना प्रियाने शेअर केलं, “येऊ कशी तशी मी नांदायला या मालिकेत अशा विलक्षण वळणावर माझ्या व्यक्तिरेखेची एंट्री होणार आहे याचा मला खूप आनंद आहे. हि मालिका खूप जास्त लोकप्रिय आहे आणि या मालिकेत प्रेक्षकांचे लाडके ओम आणि स्वीटू यांना पुन्हा एकदा एकत्र आणण्यात माझ्या व्यक्तिरेखेचा खूप मोठा हात असणार आहे त्यामुळे मी जास्त उत्सुक आहे. मी एका सकारात्मक पण तितकीच ठसकेबाज भूमिका निभावतेय त्यामुळे ती प्रेक्षकांना देखील प्रचंड आवडेल याची मला खात्री आहे.”
