चेहऱ्यावरील डेड स्किन काढण्यासाठी शिळ्या पोळीपासून तयार करा फेस स्क्रब
हिवाळा असो वा उन्हाळा त्वचेवर धुळ, माती, प्रदूषणाचा थर सतत बसत असतो. एवढंच नाही तर प्रखर सुर्यकिरणांमुळे त्वचेवर टॅनिंग आणि डेड स्किनमुळे राठपणा निर्माण होतो. त्वचेवरील हा राठपणा कमी करून त्वचा तजेलदार करण्यासाठी चेहऱ्यावर नियमित स्क्रबरचा वापर करायला हवा. कारण नुसतं मॉईस्चराईझर लावून त्वचा मऊ होणार नाही. यासाठी आधी त्वचा मुळापासून स्वच्छ करणं गरजेचं असतं. स्किन केअर रूटिनमध्ये यासाठीच स्क्रबिंग करण्यावर जास्त भर दिला जातो. तुमच्या त्वचेची योग्य निगा राखण्यासाठी जर तुम्ही एखादा बेस्ट फेस स्क्रब घरीच तयार करण्याचा विचार करत असाल तर हा फेस स्क्रब तुमच्या नक्कीच फायद्याचा आहे. यासाठी तुम्ही घरातील शिळ्या पोळीचा (चपाती) वापर करू शकता. स्वयंपाक घरातील शिळी पोळी वापरून चेहऱ्यासाठी फेस स्क्रब कसा तयार करायचा हे अवश्य जाणून घ्या.
शिळ्या पोळीपासून कसा तयार कराल स्क्रब -
फेस स्क्रबसाठी लागणारं साहित्य -
- एक शिळी पोळी (चपाती)
- एक चमचा मलई
- एक चिमुट हळद
- एक चमचा गुलाबपाणी
फेस स्क्रब तयार करण्याची कृती -
- पोळी मिक्सरमध्ये वाटून घ्या. शिळी झाल्याने पोळी कोरडी होऊन त्यापासून बारीक पावडर तयार होईल
- पोळीच्या या पावडरमध्ये मलई, हळद आणि गुलाबपाणी मिसळा
- सर्व साहित्य एकत्र करून त्यापासून एक छान पेस्ट तयार करा
- पोळीपासून तयार केलेली पावडर खरखरीत असल्यामुळे त्यापासून एक छान स्क्रब तयार होईल
फेस स्क्रबचा वापर कसा कराल -
- चेहरा स्वच्छ धुवून घ्या
- चेहरा कोरडा करा आणि त्यावर हा फेस स्क्रब लावा
- दोन ते तीन मिनिटासाठी चेहऱ्यावर मसाज करा
- गाल, कपाळ आणि नाकाकडील भागावर क्लॉक वाईज आणि अॅंटि क्लॉक वाईज बोटे फिरवून मसाज करा
- मानेकडे वरच्या दिशेने स्ट्रोक्स देत मसाज करा
- हा फेस पॅक एखाद्या बॉडी स्क्रब प्रमाणे तुम्ही तुमच्या संपूर्ण शरीरावर लावू शकता
- पाच ते सात मिनिटांनी चेहरा आणि मान स्वच्छ पाण्याने धुवून टाका
- चेहरा धुतल्यानंतर तो स्वच्छ पुसून घ्या आणि चेहऱ्यावर बर्फ फिरवा, ज्यामुळे स्क्रबमुळे ओपन झालेले पोअर्स पुन्हा बंद होतील
- त्यानंतर एखाद्या मॉश्चराईझर अथवा फेस क्रिमने त्वचेला पुन्हा मसाज करा
या फेस स्क्रबचा असा होईल फायदा -
जर तुमची त्वचा कोरडी असेल तर पोळीतील घटकांमुळे तुमच्या त्वचेवरील डेड स्किन निघून जाईल आणि त्वचा एक्फोलिएट होईल. हळदीमुळे तुमच्या त्वचेच्या समस्या कमी होण्यास मदत होईल कारण हळद अॅंटि बॅक्टेरिअल आहे. शिवाय या फेसे स्क्रबमध्ये मलई अथवा दुधाच्या सायीचादेखील वापर करण्यात आलेला आहे. ज्यामुळे तुमची त्वचा नैसर्गिक पद्धतीने मऊ आणि मुलायम होईल. त्वचेवरील डेड स्किन, ब्लॅकहेडस्, धुळ, माती, प्रदूषण कमी झाल्यामुळे त्वचेला पुरेसं ऑक्सिजन मिळेल आणि त्वचेचं रक्ताभिसरणही सुधारेल. ज्याचा परिणाम तुमची त्वचा नैसर्गिक रित्या ग्लो करू लागेल. हा फेस स्क्रब सर्व प्रकारच्या त्वचेसाठी उपयुक्त आहे. त्यामुळे जर तुमची त्वचा तेलकट असेल तरी तो तुम्ही वापरू शकता. कारण यामुळे तुमच्या त्वचेवरील अतिरिक्त तेल निघून जाईल आणि पिंपल्सची समस्यादेखील कमी होईल. म्हणूनच त्वचेला हायड्रेट ठेवण्यासाठी आणि नैसर्गिक पद्धतीने चमकदार करण्यासाठी घरच्या घरी हा साधा आणि सोपा उपाय जरूर करून पाहा.
